الأحد، 12 أكتوبر، 2008

من ديوان كان لازم نرقصها سوا

هاجمعكم
واحد واحد
مع كل حاجاتي الخاصه
و اولع فيكم
مش هتأثر بصراخكم
ولا هاجزع
من هوس النار المسعوره
وهي بتطلع
زي الهتافات وياكم
هاسد وداني
حتى دموعي
أمسحها
واقول دخان
واخرج واحد تاني
مش مهتم ببقاياكم
با بص في كل الاتجاهات
مطرود
من رحمتكم
أحسن ما افضل
طول العمر
شايلكم
وحدي

السبت، 11 أكتوبر، 2008

حد النسيان .. إلى نشأت نجيب

نفس التفاصيل بالظبط :
شكل الحركات
والنظرات
والضحك
حتى طريقة غضبي
ورعشة أعصابي

معرفش إنه بيشبهني
لحد الموت
وبيعرفني
لحد النسيان

الورطة
ان الواحد فينا
مضطر يعيش
ف وجود التاني

قال لي
مش انت لوحدك
اللي عليك شياطين الوحدة
ولا انت لوحدك
حر

مع ذلك
اللي هايفضل منا
يعمل للتاني جنازه
تليق بعدوّ ..

الجمعة، 10 أكتوبر، 2008

بطعم الفاشيست

مش بس قتلته
وغسلت بدموعه البلاط
لكن
بخصوص أسرته وصحابه
قدمت لهم نفسي كشاعر متجول

ما حدش يعرف خالص
مين الجاني
ولاعنديش أي هواجس
إني مطارد
أو سايب ورا مني خيوط
هاتوصلهم لإيديا

وزي جميع أصحابي الطبيعين جدا
اتعودنا ننفذ أغراضنا
من غير ما ننتبه
لإن الوقت
جرايم منسية

علشان كده
عاوز أطمنكم
أنا بخير
لا إيديا بتترعش
ولا ضميري بيتعذب
ولا محتاج اعترف

......

كان لازم
أنفذ الجريمة الكاملة
اللي اتولدت عشانها

الخميس، 9 أكتوبر، 2008

مش ذنبي

متلخبط
في خيالك
دايما طالع م الزاوية
اللي بتفصل بين كسر الروح
وصداها
دايما ..
هربان من معنى
فوضى ف ضربات القلب
ترفض تتفاوض مع أي حكيم
لما توطي على الدنيا
تحضنها بعنف
وتقول مش ذنبي
إن احنا بنكبر
اكتر م الأيام السبعه

ماتخافش
الشعر ها يهبط دايما
من قلب الشتويه
يخربش كفك
وترفرف جناحاته بخفة موت
أول مالدم يسيل
وتسلم أمرك
لديسمبر ..

الأربعاء، 8 أكتوبر، 2008

باليه الأسفلت .. إلى محمد المصري

مش هي دي المأساه الطبيعية
لمهرج حقيقي
من نسل نبي

مش هي النهايه
اللي كان لازم
نرقصها سوا
ونقفل بيها المشهد الصامت
على الإسفلت ..
و لاهي العيون اللي عملتها
من عياط مكتوم
و انتظرتها
عشرين سنة

مع إن كل شئ ابتدا في معاده
حسب الاتفاق
السحاب الأبيض
الأرض الملونة
الموسيقى البعيدة
ريش العصافير ..
..........
كل شئ
علشان ترقص بعناية
بعيد عن المعنى
تحت مطر خرافى
وبرد حميم

النهاية الوحيدة
كان لازم
نرقصها سوا

الثلاثاء، 7 أكتوبر، 2008

قال لك آه

وياما
سهرت الليالي
اجمعه وابنيه
وارجع أهده
وألمه من الأول
أبنيه من تاني
واهده
لحد ماكونت ملامحه
شوفوا
قد إيه هو شقي وشفاف
قد إيه حالم وفتاك
أنا اللي عملته لوحدي

أظن دلوقتي
أقدر أرفعه لفوق
والف بيه الشوارع
واقعد وسط الأسواق
افرشه ع الأرض
وادعيكم مجانا
تتفرجوا
على تعب الليالي الطويلة
وأنا بجربه في جسمي
قربوا
جربوا
شوفوا
أنا بنفسي اللي عملته
أنا
اللي عملته
بنفسي