بطعم الفاشيست

مش بس قتلته
وغسلت بدموعه البلاط
لكن
بخصوص أسرته وصحابه
قدمت لهم نفسي كشاعر متجول

ما حدش يعرف خالص
مين الجاني
ولاعنديش أي هواجس
إني مطارد
أو سايب ورا مني خيوط
هاتوصلهم لإيديا

وزي جميع أصحابي الطبيعين جدا
اتعودنا ننفذ أغراضنا
من غير ما ننتبه
لإن الوقت
جرايم منسية

علشان كده
عاوز أطمنكم
أنا بخير
لا إيديا بتترعش
ولا ضميري بيتعذب
ولا محتاج اعترف

......

كان لازم
أنفذ الجريمة الكاملة
اللي اتولدت عشانها